Komisioni për Integrime Evropiane ka mbajtur të mërkurën një takim të përbashkët me përfaqësues të shoqërisë civile, me qëllim të rritjes së bashkëpunimit dhe komunikimit në procesin e integrimit evropian të Kosovës.

Përfaqësuesit e shoqërisë civile: Venera Aqifi, nga “GIZ”, Albana Rexha nga “Demokraci plus”, Arbër Fetahu, përfaqësues i Grupit për Studime Politike dhe Juridike, Arben Kalaja nga instituti “Epik”, si dhe Visar Xhonbazi nga “D4D”, pasi folën për angazhimin dhe fushëveprimtarinë e organizatave që përfaqësonin, ata u angazhuan edhe për gjetjen e mënyrës më të mirë të bashkëpunimit me Komisionin.

Anëtarët e Komisionit falënderuan ata për pjesëmarrjen, dhe vlerësuan se me një bashkëpunim të ndërsjellë do të mund të bëhej më shumë në rrugën e integrimit.

Komisioni, po ashtu vlerësoi se roli i shoqërisë civile është jetik dhe i pazëvendësueshëm në të gjitha proceset integruese të vendit tonë.

Ndër gjërat që mund të bashkëpunohet me sukses u vlerësua mbikëqyrja e përbashkët e implementimit të ligjeve, si dhe miratimi i tyre e harmonizimi me ligjet e BE-së, ndërkaq, me theks të veçantë u vlerësua konsultimi i ndërsjellë dhe mbikëqyrje e përbashkët e zbatimit të marrëveshjes së MSA-së.

Të pranishmit në këtë takim, u zotuan se në të ardhme do të ketë bashkëpunim edhe më të ngushtë me qëllim të tejkalimit të sfidave që paraqet procesi i integrimit.