Sulmuesi i DC Unitedit, Wayne Rooney, beson se ai është ende mjaftueshëm i mirë për të luajtur në Premierë Ligë, që konsiderohet nga shumë njerëz si liga më e vështirë në botë.

Golashënuesi më i mirë në historinë e Manchester Unitedit dhe Kombëtares së Anglisë u largua nga Evertoni në qershor dhe nënshkroi kontratë trevjeçare e gjysmë me klubin amerikan.

“Nëse tregohem i sinqertë, unë e di se sa i përket aftësisë, unë ende mund të luaj në Premierë Ligë. E di këtë gjë. Gjithmonë kam qenë një njeri me shumë vetëbesim dhe kam pritje të mëdha për veten. Unë u transferova këtu duke pritur nga vetja paraqitje të mirë dhe mendoj se ishte një surprizë për njerëzit që i shprehnin mendimet e tyre për mua, gjë të cilën kanë të drejtë ta bëjnë, por unë kurrë nuk i dyshova aftësitë e mia”, ka thënë Rooney.