Kryetari i Komisionit për Punë të Jashtme të Bundestagut gjerman, Michael Roth, i bëri thirrje Bashkimit Evropian (BE) dhe Shteteve të Bashkuara të Amerikës (ShBA) që të insistojnë në hetimin dhe përsëritjen e zgjedhjeve të mbajtura në Serbi më 17 dhjetor.

“Shtetet e Bashkuara të Amerikës dhe Bashkimi Evropian e bëjnë veten krejtësisht jo bindëse nëse vazhdojnë të banalizojnë ngjarjet në Serbi. Zgjedhjet duhet të kontrollohen dhe të përsëriten. Regjimi serb duhet të ndalojë politikën e sharrave mes Rusisë dhe Perëndimit. Vuçiqi kërcënon paqen në Ballkanin Perëndimor”, ka shkruar Roth në rrjetin social “X”.

Së bashku me komentin e tij, Roth ka ndarë një tekst autorial të Dragan Gjilas për “Politico”, në të cilin kreu i Partisë Liri dhe Drejtësi vlerëson se edhe në botën e sotme komplekse, mbështetja perëndimore për Vuçiqin, i cili akuzon Perëndimin për nxitjen e trazirave në vendin e tij, është befasuese.

Kjo nuk është hera e parë që Roth i ka bërë thirrje BE-së dhe ShBA-së që të ndryshojnë politikën e tyre ndaj Serbisë, prandaj kryeministrja Ana Bërnabiq e ka akuzuar dikur në rrjetet sociale për “përhapjen e gjuhës së urrejtjes kundër Serbisë”.