Amir Rrahmani dhe Nedim Bajrami janë zgjedhur në formacionin e javës të 23-të të Serie A, pas paraqitjeve brilante në fundjavën që shkoi me skuadrat e tyre.

Dyshja shqiptare realizuan nga një gol këtë xhiro. Mbrojtësi i Napolit, Rrahmani, shënoi gol dhe bëri një paraqitje tejet të mirë në fitoren 4-1 ndaj Salernitanas. Ndërsa, fantazisti i Empolit, Bajrami shënoi gol kundër Romës në humbjen 2-4.

Reprezentuesi i Kosovës, Rrahmani është vlerësuar me notën 8.0, ndërsa mesfushori i kombëtares kuqezi me notën 7.9. Rrahmani së bashku me Bani dhe Patric bëjnë treshen e mbrojtjes, ndërsa Bajrami është vendosur prapa sulmuesve Tammy Abraham dhe Dries Mertens në sistemin 3-4-1-2.