Ditë e re në gjyqin e Ryan Giggsit, i akuzuar nga ish-partnerja e tij, Kate Greville, për sulm dhe sjellje shtrënguese.

Ish-lojtari i njohur uellsian i Manchester Unitedit bëri rrëfimin e tij të parë përpara gjykatës së kurorës së Manchesterit. Aty pranoi se “nuk mund t’i rezistojë kurrë një gruaje tërheqëse” dhe rrëfeu se kishte tradhtuar ish-gruan e tij Stacey me Kate Greville. Lidhja që nisi me këtë të fundit, siç raportoi futbollisti, kishte nisur kur të dy ishin të martuar.

Sipas fjalëve të publikuara nga gazeta “Daily Mail”, Giggs ka thënë nga pozicioni i dëshmitarit se kurrë nuk u kishte qëndruar besnik të gjitha ish-të dashurave, ndaj e quajti veten “një person filtrues nga natyra”.

Legjenda e futbollit ka folur për tradhtinë që ia kishte bërë ish-bashkëshortes me kunatën e tij Natasha, partneren e vëllait. Në vitin 2011 duket se Giggs i kishte ofruar vëllait të tij Rhodri 280 mijë euro për të heshtur dhe për të mos nxjerrë më shumë informacion në lidhje me këtë. Në të njëjtin vit, “Daily Mirror” raportoi për një tradhti të supozuar të Giggsit me Lorraine Lever, nënën e kunatës së tij, Natasha.

I pyetur nëse e kishte goditur ndonjëherë Kate Greville, uellsiani i Manchester Unitedit nuk kishte dyshime: “Jo”. Giggs, gjithashtu, iu përgjigj me “jo” pyetjeve nëse Kate ishte bërë “skllave e kërkesave të tij”, se e kishte kërcënuar apo detyruar të kryente seks ndonjëherë një grua. Kate Greville e akuzon atë se e kishte goditur me kokë në fytyrë gjatë një debati. Lojtari e pranoi përplasjen, por tha se ishte i sigurt se nuk ishte e qëllimshme.