![](https://www.epokaere.com/wp-content/uploads/2024/05/serbet-smigic-sulm-veri-polici-zvecan-kfor-768x432-1-600x360-1.webp)
“Rreziku është që KFOR-i mund ta marrë në kontroll veriun e Kosovës”
Presidentja Vjosa Osmani ka zhvilluar takim me komandantin e KFOR-it Oezkan Ulutash me të cilin kanë diskutuar për hapjen e urës së Ibrit. Presidentja Osmani ka thënë se ura duhet të hapet por vetëm në koordinim me aleatët e Kosovës që, sipas presidentes, hapja e urës të jetë sukses afatgjatë. Bashkësia ndërkombëtare ka thënë se hapja e urës në këtë kohë mund të nxis ngritjen e tensioneve në veri të vendit. Ndërkohë, përfaqësuesit e partisë në pushtet Vetëvendosje kërkojnë nga KFOR-i t’i bëjë publike se nga kush vinë kërcënimet për ngritje të tensioneve nëse hapet ura e Ibrit.
Qeveria e Kosovës ende nuk e ka pranuar raportin final nga kompania e cila është angazhuar për matjet dhe testimet e qëndrueshmërisë së urës së Ibrit. Kështu i tha RTV21 zëvendësministri i Infrastrukturës Hyseni Durimishi. Sipas tij, një raport i tillë pritet të dal në ditët në vazhdim. Qeveria e Kosovës ende nuk e ka caktuar një datë se kur planifikon ta hapë urën për qarkullimin e automjeteve ani pse një raport preliminar i cili ishte publikuar javën e kaluar kishte konstatuar se ura mbi lumin Ibër është stabile, e qëndrueshme dhe funksionale.
Ndërkohë, sikurse SHBA-ja, BE-ja dhe NATO edhe presidentja Vjosa Osmani ka thënë se ura e Ibrit duhet të hapet në koordinim me aleatët e Kosovës përmes një plani të përbashkët. Presidentja e cila gjatë ditës priti në takim komandantin e KFOR-it, Oezkan Ulutash, tha se statusi i urës së Ibrit nuk duhet të diskutohet me Serbinë.
“Hapja e urës si akt normalizimi e integrimi është në interes të të gjithë qytetarëve, pa dallim etnie. Suksesi afatgjatë e i qëndrueshëm arrihet gjithnjë bashkë me aleatë!”, tha Osmani.
Bashkësia ndërkombëtare e ka kritikuar Qeverinë e Kosovës për veprime të njëanshme në veri të vendit, ndërsa Bashkimi Evropian ka paralajmëruar ashpërsimin e masave ndëshkuese ndaj Kosovës. Ndërkohë, komandanti i KFOR-it ka deklaruar se nuk hezitojnë të trajtojnë çdo zhvillim që do të ndikojë në mjedisin e sigurisë në veri të vendit.
Deputeti i Vetëvendosjes, Armend Muja, tha se Qeveria ka dy synime: i pari që t’ia sqarojë bashkësisë ndërkombëtare se hapja e urës së Ibrit është në të mirë të qytetarëve dhe e dyta që të bisedojë me qytetarët serb në veri. Por, deputeti Muja i bëri thirrje KFOR-it që në fokus t’i ketë bandat kriminale serbë që gjendet përreth kufirit Kosovë-Serbi që kanë lidhje me Milan Radojiçiqit.
“Nëse thua ti që ka pasiguri kjo presupozohet se ti ki ndonjë njohuri. Të gjithë akterët e sigurisë përfshirë edhe KFOR-it të na japin informacione se nga kush kërcënohet siguria. KFOR-i nuk duhet të diskutoj për urën si pretekst, por KFOR-i duhet të diskutoj për atë rrezik. Implikimi këtu është që ekziston një grup që ka ndërlidhje me kriminelin Radojiçiq matanë kufirit”, tha Muja.
Ish-diplomati, Lutfi Bilalli, vlerëson se synimi i Qeverisë për hapjen e urë së Ibrit është e drejtë ligjore, por sipas tij, duhet të merren parasysh kërkesat dhe shqetësimet e bashkësisë ndërkombëtare të cilat vlerësojnë se hapja e urës pa koordinim mund të nxisë dhunë në veri të vendit.
“Vendet e QUINT-it tregojnë se kanë informacione nga NATO që situata mund të përkeqësohet nëse hapet ura. Jam i bindur se inteligjenca e NATO-s ka informacione të sakta. Serbia që nga Bansjka po tenton që me grupet e saj në veri të shkaktojë incidente”, tha Bilalli.
Bilalli vlerëson se presidentja Osmani po bën diplomaci më pozitive në raport me bashkësinë ndërkombëtare duke kërkuar që ura të hapet në koordinim me aleatët e Kosovës.
“Presidentja është duke luajtur një rol pozitiv sepse ne nuk guxojmë assesi të krijomë situata konflikuoze me faktorin ndërkombëtar”.
Kryeministri, Albin Kurti, ka thënë se hapja e urës së Ibrit është e drejtë ligjore dhe nuk është kundër askujt, përfshirë aleatët e Kosovës. Por, pas kritikave të bashkësisë ndërkombëtare për mos koordinim, kreu i Qeverisë në paraqitjen e tij të fundi nga kabineti qeveritar tha se Qeveria e Kosovës do të vazhdojë konsultimet dhe koordinimet me partnerët e Kosovës për hapjen e urës së Ibrit.