Komiteti për menaxhimin dhe parandalimin e përhapjes së Covid-19, nën udhëheqjen e nënkryetarit të Gjilanit, Arbër Ismajli, ka mbajtur takimin për vlerësimin e situatës për dy ditët e fundit.

Ismajli ka thënë se ka një rritje të infeksionit me Covid në Gjilan ditëve të fundit, duke shtuar se kjo dëshmon që virusi është prezent në mesin tonë.

“Kemi një rritje të ndjeshme të rasteve të reja pozitive dhe kjo dëshmon se virusi është ne mesin tonë. Andaj, apeloj qytetarët dhe bizneset që japin shërbime që të vazhdojnë t’i respektojnë masat, vendosjen e maskës dhe mbajtjen e distancës”, ka thënë Ismajli.

Pasqyra e përgjithshme në Gjilan që prej fillimit të pandemisë është si vijon: nga 12 479 mostra, 3 773 kanë rezultuar pozitivë, 3 464 janë shëruar, 111 qytetarë e kanë humbur betejën me virusin, 200 raste janë aktive, të hospitalizuar me Covid janë 28 persona.

Në këtë takim u bë me dije se është shqetësues fenomeni i ditëve të fundit i ndezjes së maleve në Gjilan, derisa janë apeluar qytetarët që të mos vazhdojnë me këso akte të shëmtuara, përndryshe në momentin që identifikohen do të ballafaqohen me organet e drejtësisë.