Disa nga lokalet e gastronomisë kanë vendosur që pas hapjes të ngrisin çmimet e kafes.

Për këtë çështje, ka dhënë vërejtje Autoriteti Kosovar i Konkurrencës.

Drejtori i AKK-së, Valon Prestreshi ka thënë se këto lokale me marrëveshje mes vete kanë rritur çmimet, duke paralajmëruar hetim nga AKK.

Kësisoj, ai i ka bërë thirrje Shoqatës së Gastronomëve që të distancohet nga kjo dukuri.

Postimi i plotë:

Gjithë ato ankesa, gjithë ato protesta, gjithë ai presion që u ushtrua nga sektori i gastronomisë, kundrejt masave të vendosura nga Qeveria për ta parandaluar infeksionin Covid 19, e që kishin të drejtë në disa raste, tani po të njëjtit gastronomë në disa qytete të Kosovës kanë vendosur që bashkërisht me marrëveshje t’i ngrisinë çmimet e kafeve dhe produkteve tjera.

Kjo formë e ngritjes së çmimit është e ndaluar, andaj para se të inicoj procedura hetimore Autoriteti Kosovar i Konkurrencës, si titullar i këtij institucioni fillimisht i bëjë thirrje Shoqatës së Gastronomëve, që ata të distancohen nga këto sjellje të gastronomëve dhe të bëjnë thirrje për ndalim të këtyre veprimeve.

Në të kundërtën, derën e parë që do ta trokasim është dera e shoqatës së gastronomëve.