Rritet numri i emigrantëve ilegalë, Gjermania shton kontrollet me Poloninë
Gjermania ka shtuar masat e sigurisë në kufirin polak për të kontrolluar fluksin e lartë të refugjatëve që futen në vend nga Bjellorusia.
Ministri i Brendshëm i Gjermanisë, Horst Seehofer, tha për gazetën “Bild” se bë kufirin gjermano-polak janë vendosur 800 policë, për të ndihmuar në trajtimin e fluksit të refugjatëve, që kalojnë në Gjermani nga Bjellorusia.
“Nëse është e nevojshme, jam i gatshëm ta përforcoj edhe më shumë këtë”, shtoi ai.
Policia shpërndau të dielën rreth 50 aktivistë nga grupi radikal i ekstremit të djathtë “Rruga e Tretë” (Der III. Weg), i cili u kishte bërë thirrje anëtarëve të tij të mblidheshin, për të ndërmarrë veprime kundër migrantëve që kërkonin të kalonin kufirin nga Polonia. Rritja e numrit të njerëzve që kalojnë ilegalisht kufirin lindor të BE-së me Bjellorusinë, ka vënë në vështirësi të mëdha shtetet anëtare.
Polonia ka propozuar ndërtimin e një muri prej 350 milionë eurosh (410 milionë dollarë) në kufirin e saj me Bjellorusinë për të mbajtur jashtë emigrantët.
I pyetur nëse mure të tilla kufitare ishin të nevojshme, Seehofer tha: “Është legjitime për ne që të mbrojmë kufirin e jashtëm në atë mënyrë që të parandalohen kalimet e pazbuluara kufitare.”
Sipas shifrave të ministrisë së brendshme gjermane, rreth 5,700 njerëz kanë kaluar kufirin midis Gjermanisë dhe Polonisë pa leje hyrje që nga fillimi i vitit./oranews/