Abdullah Klinaku, kryetar i Demokracisë Konservatore, i cili garon për deputet në kuadër të koalicionit me AAK-në, ka theksuar se rritja e dhunës në shkolla është një sinjal alarmi për sistemin e edukimit.

Sipas tij, lënda e “Edukimi Fetar” është zgjidhja.

“Rasti i fundit ku një nxënës 11-vjeçar është dhunuar nga bashkëmoshatarët e tij tregon qartë se sistemi ynë arsimor është në krizë. Dhuna nëpër shkolla nuk është më një fenomen i izoluar, por një problem serioz që po përhapet gjithnjë e më shumë. Kjo situatë kërkon reagim të menjëhershëm dhe masa konkrete për ta ndaluar”, ka shkruar ai në Facebook.

Reagimi i plotë i tij:

Reagim me urgjencë

Rritja e Dhunës në Shkolla – Një Sinjal Alarmi për Sistemin e Edukimit. Lënda e “Edukimi Fetar” është zgjidhja.

Rasti i fundit ku një nxënës 11-vjeçar është dhunuar nga bashkëmoshatarët e tij tregon qartë se sistemi ynë arsimor është në krizë. Dhuna nëpër shkolla nuk është më një fenomen i izoluar, por një problem serioz që po përhapet gjithnjë e më shumë. Kjo situatë kërkon reagim të menjëhershëm dhe masa konkrete për ta ndaluar.

Për vite kemi lobuar për futjen e lëndës së Edukimit Fetar në Shkolla, si një mënyrë për t’u mësuar fëmijëve parime të shëndetshme, si dashuria, dhembshuria dhe respekti i ndërsjellë. Kjo lëndë do të ndihmonte në formimin moral të brezave të rinj dhe në parandalimin e rasteve të dhunës, por fatkeqësisht ende nuk ka gjetur mbështetje nga institucionet përkatëse.

Në vend që të shohim hapa konkretë për të adresuar këtë krizë, kemi një ministre që reagon sikur të jetë përfaqësuese e një shteti tjetër. Të thuash se dhuna është e papranueshme është minimale, por çfarë masash po merren për të parandaluar raste të tilla? Për më tepër, deklarata se “Mitrovica ka dëshmuar në qeverisje” është thjesht një klishe pa asnjë ndikim në realitetin që po përjetojnë fëmijët në këtë qytet dhe në gjithë vendin.

Ministre, a jeni ministre vetëm për Prishtinën, apo për të gjithë vendin? A jeni ministre edhe e Mitrovicës? Rasti i dhunës ndaj një fëmije 11-vjeçar nuk është thjesht një statistikë, por një dështim i institucioneve për të krijuar një mjedis të sigurt dhe të shëndetshëm për nxënësit. Është koha për më shumë përgjegjësi, më shumë angazhim dhe mbi të gjitha, për veprime konkrete që të ndalojnë këtë trend të rrezikshëm.