Deputeti i Lidhjes Demokratike të Kosovës (LDK), Naser Rugova, ka kundërshtuar propozim rezolutën e hartuar nga koalicioni qeverisës lidhur me procesin e dialogut me Serbinë.

Ai ka thënë se kjo rezolutë e ka përmbajtjen e njëjtë me rezolutën e propozuar nga opozita javë më parë.

Rugova ka bërë thirrje që të përfundohet seanca e jashtëzakonshme në të cilën është kërkuar miratimi i rezolutës opozitare me të cilën kundërshtohet ndryshimi i kufijve të shtetit të Kosovës.

“Pothuajse të njëjtën përmbajtje e kishte propozuar opozita javë më parë, andaj ta vazhdojmë atë seancë që ka mbetur e hapur dhe të përmbyllim një qëndrim dhe vendim konsensual në interes të rendit kushtetues të vendit”, ka deklaruar Rugova.

/Epoka e re/