Kryetari i Odës Ekonomike të Kosovës (OEK), Berat Rukiqi, ka mbajtur të martën konferencë për medie, lidhur me zhvillimet ekonomike në vend.

Ai me këtë rast ka thënë se edhe pas 12 vjet pavarësi, mbeten mjaft sfida për vendin, siç është shkalla e lartë e rrezikut politik dhe shkalla e lartë e pasigurisë juridike, etj.

Sipas tij, tri barrierat kryesore në vend për bizneset mbeten, konkurrenca e padrejtë në vend që është renditur në mesin e top barrierave të raportuara në shkallën 37 për qind, pasuar nga kamatat e larta në shkallën 36 për qind dhe ekonomia informale me 33 për qind.

Rukiqi foli dhe për çështjen e taksës 100 për qind dhe tha se  Oda e përkrah çdo vendim qeveritar që është në interes të vendit. “Kur është në pyetje interesi shtetëror ne mendojmë që duhet të përkrahim vendimet që janë për interesi shtetërore, sikur ka qenë vendosja e tarifës dhe tani do të përkthim çdo vendim që është në interes”, u shpreh Rukiqi.

Rukiqi gjatë shpalosjes së indikatorit të klimës së të bërit biznes, tha se korrupsioni dhe nepotizmi janë në nivele shqetësuese, sepse sipas tij, pastaj po krijohet burokraci.

Sipas tij, rritja ekonomike mbetet e varur nga investimet publike dhe nga remitencat.

Rukiqi tutje ka thënë se Kosova ende ballafaqohet me vendime populiste që po ndikojnë negativisht tek bizneset. Ai  tutje ka deklaruar  se rreth 10 milionë euro mund të shkojnë dëmet nga vendimet komunale për ndalimin e bizneseve e që të punojnë ditën e diel.

Sipas tij, Kosova është ndër vendet më të ulëta të ndërmarrësisë në botë, ndërsa shtoi se eksporti rrallë tejkalon 350 milionë euro, që është shumë pak sipas Rukiqit.