Rusia ka propozuar një udhërrëfyes për normalizimin e raporteve midis Sirisë dhe Turqisë. Ky propozim u bë gjatë takimit të parë të ministrave të Jashtëm të këtyre shteteve që kur ka nisur lufta civile siriane një dekadë më parë.

“Detyra jonë është të përcaktojmë udhëzimet e përgjithshme për progres të mëtejmë”, ka thënë gjatë takimit ministri i Jashtëm rus, Sergei Lavrov.

Në këtë takim që ka marrë pjesë edhe një diplomat i lartë iranian.

“Rezultati më i mirë i diskutimeve tona do të ishte një marrëveshje për të udhëzuar ekspertët që të përgatisin një draft-udhërrëfyes për normalizimin e raporteve mes Sirisë dhe Turqisë në takimin e radhës të ministrave”, ka thënë Lavrov.

Kryediplomati rus, ka thënë se ky propozim më pas do t’iu dërgohet liderëve të Rusisë, Iranit, Sirisë dhe Turqisë.

Turqia mbështet forcat rebele që po luftojnë për të rrëzuar nga pushteti presidentin sirian, Bashar al-Assad. Ankaraja ka prezencë ushtarake në pjesët veriore të Sirisë, prani që ka zemëruar Damaskun.

Presidenti turk, Rexhep Taip Erdogan, ka përmirësuar raportet me ish-rivalët në mbarë rajonin dhe tani është përqendruar që të mbajë një samit me homologun e tij sirian, Bashar al-Assad.

Lavrovi ka thënë se Siria dhe Turqia duhet të nisin diskutimet për riparimin e infrastrukturës dhe logjistikës dhe të “rinisin tregtimin dhe bashkëpunimin ekonomik pa barriera”, raporton “Rel”.

Ndërmjetësimi i Kremlinit synon t’i japë ndikim politik presidentit rus, Vladimir Putin, shteti i të cilit është izoluar ndërkombëtarisht që kur nisi pushtimin e Ukrainës shkurtin e vitit të kaluar.

Damasku gëzon mbështetjen e Moskës, që ka intervenuar në luftën civile më 2015, duke kryer sulme ajrore në mbështetje të forcave qeveritare siriane.