Kremlini ka thënë të premten se vendimi i Bashkimit Evropian për t’i dhënë statusin e kandidatit Ukrainës, aty ku Rusia po zhvillon një fushatë ushtarake është tërësisht “një çështje e brendshme” e unionit.

“Këto janë, natyrisht, çështje të brendshme evropiane. Për ne është thelbësore që të gjitha këto procese të mos sjellin më shumë probleme tek ne dhe në marrëdhëniet e vendeve të lartpërmendura me ne. Dhe se kjo nuk çon në një përkeqësim të mëtejshëm të marrëdhënieve tona me BE-në”, u ka thënë Dimitry Peskov gazetarëve në një konferencë për mediet.

Gjithashtu të premten, edhe ministri i jashtëm i Rusisë, Sergei Lavrov, ka thënë se perspektiva evropiane e Ukrainës dhe Moldavisë nuk përbënte “rrezik”për Rusinë, pasi sipas tij BE-ja nuk është një aleancë ushtarake.

Megjithatë, ai ka akuzuar BE-në dhe NATO-n se po mbledhin një “koalicion” për t’u përgatitur për një luftë me Rusinë, duke i krahasuar ato me aleancën naziste të Luftës së Dytë Botërore.

“Hitleri nën flamurin e tij kishte bashkuar një pjesë të madhe të vendeve evropiane për të luftuar kundër Bashkimit Sovjetik. Sot BE-ja dhe NATO po bashkojnë një koalicion të tillë për të bërë luftë kundër Rusisë”, ka thënë Lavrov gjatë një vizite pune në Azerbajxhan.

Marrëdhëniet e Rusisë me Perëndimin kanë qenë nivelin më të ulët që kur presidenti Vladimir Putin dërgoi trupa në Ukrainë, duke shkaktuar edhe një breshëri sanksionesh të vendosura ndaj Moskës.

Udhëheqësit e BE-së ia kanë dhënë të enjten statusin e kandidatit Ukrainës dhe Moldavisë, por thanë se Gjeorgjia, e cila gjithashtu ka aplikuar për anëtarësim, mund ta marrë këtë status vetëm pasi të trajtohen çështjet e pazgjidhura.