18 gola dhe 14 asistime në të gjitha ndeshjet e zhvilluara deri më tani tregojnë se sulmuesi egjiptian i Liverpoolit, Mohamed Salah, po luan një pjesë të parë të sezonit të shkëlqyer. Ai realizoi dy gola në fitoren 6-3 që “The Reds” arritën ndaj Tottenhamit.

“Kemi bërë një ndeshje shumë të mirë në sulm, por në mbrojtje duhet të përmirësohemi ende si ekip. Të pësosh tre gola është mjaft e vështirë për t’u pranuar, pasi nëse nuk shënon mund ta humbasësh takimin. Ky është një rezultat i mirë, le të vazhdojmë kështu”, ka thënë Salah.

“Ne e prisnim këtë ndeshje disi kaotike ndaj Tottenham. Mënyra se si ata luajnë, ata e hapin lojën, ata argëtohen, janë fizikisht të fortë. Kështu që, ne duhej të ishim gjithmonë të fokusuar. Në fushën e tyre janë të fortë, ndaj jam i lumtur që kemi fituar sepse ata luajnë futboll të tillë”, ka shtuar egjiptiani.

Falë këtij dygolëshi, Salah u bë lojtari i katërt që shënon më shumë për fanellën e Liverpoolit: “Është fantastike të arrish këtë moment historik në një klub kaq të madh, por gjëja më e rëndësishme është që ne e fituam ndeshjen. Kudo që ta përfundoj karrierën time, jam i lumtur me këtë rezultat”, ka deklaruar Salah.