Ish-komandanti i Zonës Operative të Drenicës, Sami Lushtaku , në emisionin “Frontal” në “Televizionin 7”, ka thënë se nuk ka dëgjuar asnjëherë për Brigadën “Hasan Prishtina”, e sipas tij kjo është krijuar vetëm në mendjen e njerëzve, por asnjëherë në Drenicë.

“Unë jam befasuar pasi asnjëherë për dy vite në Zonën Operative të Drenicës nuk kam dëgju për këtë brigadë. Kjo është fantomë, nuk ka ekzistuar asnjëherë. Ka mundësi që Fadili ta ketë pasur në mendjen e vet si brigadë por në Zonën Operative të Drenicës nuk ka qenë asnjëherë”, ka thënë Lushtaku.

I ftuar për të biseduar për fryrjen e listave të veteranëve të luftës, Lushtaku ka thënë se ka qenë i vetëdijshëm që do të ketë parregullsi në listat e veteranëve, mirëpo nuk e ka pritur që do të ketë numër kaq të madh të njerëzve që nuk kanë qenë pjesë e Ushtrisë Çlirimtare të Kosovës dhe janë bërë pjesë e listës së veteranëve.