Kreu i Aleancës për Ardhmërinë e Kosovës, Ramush Haradinaj, ka thënë se Kosova duhet të ndërrohet Qeveria në zgjedhjet e shkurtit të vitit të ardhshëm, që Kosova të jetë pjesëmarrëse në Samitin e NATO’s që do të mbahet në Tiranë në vitin 2027, shkruan Reporteri.net.

Sipas tij, pas ndërrimit të Qeverisë duhet angazhim i ngushtë dy vjet pandalur me Shtetet e Bashkuara të Amerikës dhe NATO’n.

Haradinaj ka thënë se deri atëherë, tranzicioni i ushtrisë do të jetë praktikisht i përfunduar.

“Kryeministri shqiptar Edi Rama, ka paralajmëruar se Shqipëria do të jetë mikpritëse e Samitit të NATO-s në vitin 2027. Kjo është një mundësi e mirë që Kosova të ketë zërin e vet direkt në Samitin e NATO-s. Deri atëherë, tranzicioni i Ushtrisë sonë do të jetë praktikisht i përfunduar, kjo sipas Planit që kemi futur në funksion në fund të vitit 2018. Por, për të arritur që Kosova të jetë në Samitin e NATO-s në Tiranë më 2027, së pari duhet ta ndërrojmë Qeverinë më 2025 dhe të kemi dy vjet pandalur në angazhim të ngushtë me SHBA dhe NATO”, ka shkruar Haradinaj.

Ndryshe, Kryeministri shqiptar, Edi Rama, ka deklaruar sot se në vitin 2027 Shqipëria do të mirëpresë samitin e NATO-s.

Rama i bëri këto komente gjatë konferencës së ambasadorëve, që po mbahet në Tiranë, ku tha para ambasadorëve se diplomacia shqiptare tashmë ka hyrë në një dinamikë të re.

“Vitin e ardhshëm do të jemi vendi që do të mirëpresë liderët e 44 shteteve evropiane – nga Britania e Madhe në Ukrainë apo nga Suedia, Norvegjia deri në Turqi – në samitin e Komunitetit Politik Evropian. Më 2027 do të kemi mundësinë të jemi mikpritës të samitit të NATO-s. Gjëra që as nuk mund të imagjinoheshin vite më parë – që Shqipëria të bëhej një pikë referimi e t’i besoheshin të tilla role”, deklaroi Rama.

Samiti i sivjetmë i NATO-s është mbajtur nga 9 deri më 11 korrik në Ëashington.