Sindikata e Bashkuara e Arsimit, Shkencës dhe Kulturës (SBAShK) përmes një reagimi për medie i ka bërë thirrje ministrit të Financave, Hekuran Murati, që të gjej një zgjidhje ligjore në mënyrë që të ekzekutohen pagat për mësimdhënësit sot.

Kjo sindikatë ka vlerësuar se mosekzekutimi i pagave do të paraqes probleme për ata arsimtarë që jetojnë vetëm me një pagë dhe shumë më keq për ata që kanë kredi dhe këste për të paguar.

“Kujtojmë ministrin Murati se mosekzekutimi me kohë i pagave për muajin shtator shkakton efekte negative financiare te punëtorët e arsimit dhe jo vetëm nga fakti se shumica e tyre jetojnë me atë pagë dhe mezi e lidhin fillimin e muajit me fundin e tij. Aq më keq, shumë prej tyre edhe janë në kredi dhe vonesa e ekzekutimit të pagave u krijon probleme shtesë ngase këstet e kredive janë të ndërlidhura me data dhe me daljen e pagave dhe kështu të punësuarit pa fajin e tyre mund të ndëshkohen me kamata shtesë për kreditë e tyre”, është thënë në reagimin e SBAShK-ut.

Në fund, organizata që drejtohet nga Rrahman Jasharaj kanë kërkuar që të gjendet një zgjidhje urgjente, në të kundërtën ka paralajmëruar edhe veprime sindikale nëse s’do të ndodh një gjë e tillë.

“SBAShK-u kërkon urgjentisht nga ministri Murati që të ndjehet përgjegjës për mos ekzekutimin me kohë të pagave të shtatorit dhe të shtojë angazhimet e të gjejë mundësi ligjore që ekzekutimi i pagave të bëhet që sot sepse në të kundërtën do të konsultohemi me anëtarësinë dhe duke respektuar zërin e tyre, mund të nisim me veprime sindikale”, është thënë në reagimin e SBAShK-ut.