![](https://www.epokaere.com/wp-content/uploads/2022/08/shcolz.jpeg)
Scholz mbështet deportimin e emigrantëve të jashtëligjshëm
Kancelari gjerman, Olaf Scholz, ka thënë të hënën se dëshiron të rrisë deportimet e emigrantëve të jashtëligjshëm, disa ditë pas një sulmi me thikë në qytetin perëndimor të Solingenit.
“Deportimet duhet të përshpejtohen, ‘me rregullore ligjore nëse është e nevojshme’”, ka thënë Scholz gjatë një vizite në Solingen.
Kancelari gjithashtu ka kërkuar “zbatimin e qëndrueshëm dhe praktik” të ligjeve ekzistuese, përfshirë ato për emigrantët që aplikojnë për azil në Gjermani dhe jo në vendin e parë të Bashkimi Evropian ku ata mbërrijnë në kundërshtim me Rregulloren e Dublinit.
“Me siguri do të ketë kuptim të krijohet një grup i posaçëm për të studiuar këtë”, ka thënë kancelari Scholz.
Tre njerëz janë vrarë dhe tetë të tjerë janë plagosur në sulmin e së premtes së kaluar në një shesh në qendrën e qytetit të Solingenit.
I dyshuari 26-vjeç, i cili është me origjinë nga Siria është dërguar në paraburgim me urdhër të gjykatës, raporton agjencia gjermane “DPA”.
Sulmuesi, i cili dyshohet se është anëtar i grupit terrorist të Shtetit Islamik, raportohet se ishte parashikuar të deportohej në Bullgari pas mbërritjes në Gjermani në vitin 2022, por policia nuk arriti ta lokalizonte atë.