Së paku 38 palestinezë janë vrarë nga sulmet izraelite në Gaza vetëm brenda 24 orëve të fundit, dhe një trup është nxjerrur nga rrënojat, ka thënë Ministria e Shëndetësisë.

Zyra e Qeverisë për Media në Gaza ka paralajmëruar për një përkeqësim të situatës humanitare në territorin e rrethuar dhe të bombarduar, duke thënë se Izraeli dhe SHBA janë “plotësisht përgjegjës për përkeqësimin katastrofik dhe të paprecedentë” të kushteve të jetesës.

“Kriza e ushqimit do të përkeqësohet në mënyrë dramatike në ditët në vijim për shkak të pengimit të okupimit të importeve të karburanteve”, tha zyra, duke u bërë thirrje “të gjitha vendeve të lira të botës të dënojnë këto krime, të cilat ligji ndërkombëtar i ka klasifikuar si krime kundër njerëzimit”.

Në ndërkohë, Avichay Adraee, një zëdhënës në gjuhën arabe për ushtrinë izraelite, ka lëshuar një urdhër zhvendosjeje të detyruar për të gjithë banorët e lagjeve Zeitoun, Tal al-Haëa dhe Sheikh Ijlin të qytetit të Gazës, ka raportuar Al Jazeera.

Agjencia humanitare e OKB-së, OCHA, ka thënë se 142,000 palestinezë u zhvendosën me forcë që kur Izraeli rifilloi luftën kundër Gazës më 18 mars.