Shefi i Grupit të Deputetëve të Pavarur, Dardan Sejdiu në një intervistë për “Telegrafin” ka folur rreth zyrtarizimit të partisë së tyre të re. Sejdiu ka thënë se subjekti i tyre dallon substancialisht dhe ideologjikisht me subjektet tjera.

Ai ka shtuar se zyrtarizimi i partisë së tyre do të ndodh më së largu nga mesi i këtij muaji.

“Në dy javët e para të majit ose ka mesi i majit do ta zyrtarizojmë formimin e partisë dhe deri në këtë kohë do të punojmë që të kemi sa më shumë hapësirë për të ftuar njerëz që të ecim përpara”, ka thënë Sejdiu.

Ai është shprehur i bindur se menjëherë pas themelimit të subjektit do të kenë degët e tyre në komunat kryesore të Kosovës.

“Orientimi jonë dhe emri jonë duhet të përfaqësoj këtë lloj ideologjie dhe këtë lloj fryme rreth socialdemokracisë në Kosovë”, u shpreh Sejdiu, duke thënë se subjektit të tyre do t’iu bashkëngjiten shumë qytetarë dhe ata që e shohin që shteti nuk duhet të jetë në funksion të disave por në funksion të të gjithëve.

Sejdiu po ashtu ka bërë të ditur se zgjedhja e udhëheqësis së subjektit të tyre do të bëhet gjatë këtij muaji.

“Sa i përket kryetarit, nënkryetarit dhe organeve tjera të partisë besoj që gjatë këtij muaji do të finalizohen të gjitha”, tha ai.