Zyrtarët e Bashkimit Evropian (BE) vazhdojnë t’ia mbushin mendjen Serbisë që të respektojë politikën e jashtme të BE-së për sanksionet kundër Rusisë pas agresionit kundër Ukrainës, por gjithashtu paralajmërojnë për pasoja të mundshme nëse Serbia zgjedh anën e gabuar për luftën në Ukrainë.

“Serbia nuk është e bindur se sanksionet (kundër Rusisë) janë përgjigjja e duhur për momentin. Ne po ia bëjmë të qartë Serbisë se cili do të jetë çmimi nëse vendi është në anën e gabuar të konfliktit”, ka thënë Michael Siebert, i cili është përgjegjës për marrëdhëniet me Rusinë dhe Partneritetin Lindor në BE.

Siebert i ka bërë këto deklarata në një diskutim në Komitetin e Politikës së Jashtme të Parlamentit Evropian kushtuar luftës në Ukrainë, gjatë të cilit ligjvënësit evropianë pyetën se cilat do të ishin pasojat për Serbinë për refuzimin e saj për të vendosur sanksione ndaj Rusisë.

Përveç Bjellorusisë, Serbia është i vetmi vend në Evropë që nuk ka vendosur sanksione ndaj Rusisë. Si një vend kandidat për anëtarësim të plotë në BE, pritet që të përafrojë politikën e saj të jashtme me politikat evropiane, raporton “Radio Evropa e Lirë” në gjuhën serbe.

Presioni ndaj Serbisë është intensifikuar javët e fundit, kur BE-ja vendosi një sërë masash kufizuese kundër Rusisë për shkak të agresionit ndaj Ukrainës.

Një grup deputetësh i ka kërkuar tashmë Komisionit Evropian që të ngrijë përkohësisht bisedimet e pranimit në BE me qeverinë serbe dhe mbështetjen financiare.