Pak pas mesnatës, shteti i Serbisë ka filluar zbatimin e marrëveshjes në mes të Kosovës dhe Serbisë, sipas të cilës asnjëra palë nuk do t’i lëshojë dokumentet për hyrje-dalje për shtetasit e palës tjetër.

Kështu në pikë kalimin kufitarë në Jarinje, polici kufitar serb ka pranuar dhe procesuar më tej dokumentin identifikues të lëshuar nga autoritetet e Kosovës pa një fletë të bardhë shtesë, e cila lëshohej deri më tani, pasi shteti serb nuk pranonte asnjë dokument ku shkruante Republika e Kosovës.

Deri në këto momente nuk është raportuar për ndonjë eskalim të situatës në këtë pjesë të vendit, si pasojë e fillimit të implementimit të marrëveshjes së arritur në Bruksel më 27 gusht për kartat e identitetit, ndonëse ka një numër të shtuar të forcave të rendit si nga ana e KFOR-it, si nga ana e Policisë së Kosovës, të cilët po monitorojnë situatën nga afër.

Sipas të gjitha gjasave zbatimi i marrëveshje në fjalë do të vazhdojë i qetë, pa incidente madhore e përkeqësim të situatës së sigurisë.

Ndryshe gjatë ditës, shteti serb ka vendosur në muret e të gjitha pikë kalimeve kufitare në mes të Kosovës dhe Serbisë një mbishkrim, në të cilën shkruhet se letërnjoftimet e kosovarëve janë pranuar vetëm sa i përket lehtësimit të lëvizjes së lirë për qytetarët dhe për asnjë qëllim tjetër, duke bërë të ditur kështu se Serbia me këtë “lëshim” nuk po e njeh pavarësinë e Kosovës.

Në anën tjetër ministri i Punëve të Brendshme të Kosovës, Xhelal Sveçla, ka bërë të ditur se nëse Serbia në mesnatë nuk ndërpret së lëshuari regjimin e fletave hyrje-dalje për kosovarët që udhëtojnë për në Serbi, atëherë edhe Kosova është e gatshme t’i vë në funksion këto fleta si shenjë reciprociteti për shtetasit serb që hyjnë në Kosovë.

“Këtu është vetëm një opsion, por normalisht do të ketë reagim nga ana jonë nëse ai opsion nuk vihet në funksion. Pra, largimi i këtyre fletëve hyrje-dalje, sipas informative që kemi dhe duke pasur parasysh edhe vendosjen e këtyre panove, në orën 24:00, Serbia do t’i ndërpresë lëshimin e tyre”, ka thënë Sveçla në një intervistë për Radio Televizionin e Kosovës, RTK.

Të njëjtën gjë pati lajmëruar edhe kryeministri i Kosovës, Albin Kurti, në një paraqitje publike. Sipas tij më 1 shtator kosovarët të cilët do të udhëtojnë për në Serbi nuk do të kenë nevojë të pajisen me dokumente shtesë përcjellëse, kjo fal marrëveshjes e cila, sipas Kurtit u arrit më 27 gusht.

“Nuk ka dokumente përcjellëse, pra vetëm tregohet karta e identitetit. Pra qytetari i Kosovës kur kalon nëpër Serbi ose kur shkon në Serbi do ta bëjë këtë lirisht, pa marrë asnjë dokument tjetër dhe njësoj kur vjen ai i Serbisë, qysh ka qenë edhe në të kaluarën realisht nuk do të ketë nevojë që as polici jonë t’i jap dokument shtesë”, pati njoftuar Kurti gazetarët për detajet e marrëveshjes së arritur në Bruksel.

Ishte Josep Borrell, përfaqësuesi i lartë i Bashkimit Evropian për politikë të jashtme, ai i cili dha lajmin se marrëveshja ndërmjet Kosovës dhe Serbisë për kartat e identitetit u arrit.

Në fakt marrëveshja e arritur më 27 gusht nuk ishte një marrëveshje e re.

Thjesht ishte një zotim i të dyja palëve se tash e tutje do të respektohen marrëveshjet e vitit 2011 për Lëvizje të Lirë e cila parashihte që qytetarët e dy vendeve do lëviznin nga njëri shtet në tjetrin vetëm me kartat e identitetit.

Problemi ishte se Serbia nuk e aplikonte ashtu si ishte arritur marrëveshja dhe u lëshonte kosovarëve edhe nga një letër të bardhë për hyrje/dalje.

Kosova nuk e bënte të njëjtën. Siç ishte shpjegimi atëherë, shteti i Kosovës kishte refuzuar të bëjë për shkak të mos detyrimit të shqiptarëve të Luginës për një letër të tillë.

Por, ka shumë mundësi që nuk bëhej edhe për shkak të rebelimit që do të mund të ndodhte nga ana e serbëve të Kosovës.

Kryeministri aktual, Albin Kurti, vendosi që ta vë në funksion këtë letër të bardhë, nëse Serbia vazhdon me të njëjtën.