Kreu i misionit vëzhgues të Parlamentit Evropian, Klemen Groshelj, tha se pret që reagimi për zgjedhjet në Serbi dhe gjithçka që ndodhi rreth tyre të vijë shumë shpejt, si dhe të mos jetë në favor të Serbisë dhe qeverisë së saj.

“Diskutimi për zgjedhjet në Serbi do të jetë në agjendën e PE-së edhe para raportit përfundimtar të ODIHR-it dhe do të ketë reagim ndaj sulmeve të përfaqësuesve të qeverisë ndaj anëtarëve të misionit të ODIHR-it, veçanërisht Andreas Schider”, tha Groshelj dhe shtoi:

“Këto janë disa gjëra që shqetësojnë kolegët dhe kërkojnë reagim. Një reagim i tillë është i papranueshëm, sepse kur fillon të diskreditosh individë që kanë qenë vëzhgues në emër të një institucioni si PE, nuk është pritur mirë në politikën evropiane. Parlamentarët nuk e perceptojnë si sulm ndaj një individi, por si sulm ndaj një institucioni. Ajo çon edhe në reagime politike që tejkalojnë dallimet politike mes nesh si liberalë, socialistë etj. Pres reagimin e Parlamentit Evropian dhe se ai nuk do të jetë i favorshëm për Serbinë dhe autoritetet serbe”.

Duke komentuar thirrjet e disa eurodeputetëve për një hetim ndërkombëtar të parregullsive zgjedhore në Serbi, Groshelj thekson se kjo është çështje që duhet të vendosë shteti ku organizohen zgjedhjet.

“Nëse autoritetet serbe vendosin ta bëjnë këtë, do të ishte një shenjë e mirë. Kështu mund të niseshin gjërat drejt qartësimit, por nuk e pres këtë”, thotë ai.

Ai gjithashtu shton se kjo do të ndikojë shumë në qëndrimin që do të mbajë PE kur të përgatitet një raport i ri për përparimin e Serbisë drejt Bashkimit dhe se ekziston frika se dera e Serbisë drejt zgjerimit do të mbyllet shumë shpejt.

“Jam i shqetësuar se do të mbizotërojë politika oportuniste evropiane, që do të thotë se do të tolerohet ajo që ka ndodhur me Serbinë, por në të njëjtën kohë kur të fillojnë proceset e përshpejtimit të afrimit me BE-në, Serbia nuk do të jetë pjesë e atij përshpejtimi. Kam frikë se nuk do të ketë ndryshime të rëndësishme në procesin e afrimit dhe se situata do të jetë e ngjashme me atë në të cilën u gjend Turqia. Kam frikë se Serbia do të futet në kurth dhe se nga njëra anë BE-ja dhe SHBA-ja do të presin zgjidhjen e çështjes së Kosovës, që nuk do të thotë njohje e Kosovës, dhe nga ana tjetër fokusi i zgjerimit do të jetë në të gjitha vendet e tjera si Mali i Zi, Ukraina dhe Moldavia, dhe pjesa tjetër e vendeve ndoshta do të presin një të ardhme më të mirë”, beson kreu i misionit vëzhgues të Parlamentit Evropian.

Kur u pyet nëse ai, si disa në Serbi, ka përshtypjen se Brukseli është gati të kthejë kokën nga gjërat që duken thelbësore për një vend që dëshiron të jetë anëtar i BE-së, si sundimi i ligjit dhe drejtësia, për shkak të progresit në marrëveshjen mes Beogradit dhe Prishtinës dhe zgjedhjet e ndershme, Groshelj thotë se, për fat të keq, ka.

“Ju keni vende anëtare që luajnë një lojë shumë të ndyrë, që nga njëra anë tolerojnë atë që po ndodh në Serbi, presin disa mundësi biznesi për kompanitë e tyre dhe në të njëjtën kohë do të ketë nga ato vende që do ta bllokojnë Serbinë në rrugën drejt BE-së. Mendoj se për këtë Serbia po i humb shanset në zhvillimin e saj ekonomik”, thotë ai.

Groshelj shton se presidenti Aleksandar Vuçiq shihet në Bruksel dhe Uashington si një bashkëbisedues i dobishëm që bën përparime të caktuara kur është fjala për dialogun ndërmjet Beogradit dhe Prishtinës.

“Lëvizjet e tij japin shpresë se marrëdhëniet mes Kosovës dhe Serbisë do të ndryshojnë. Në Bruksel dhe në Uashington presin njohjen e Kosovës dhe atë do ta bëjë Vuçiq dhe partia e tij. E di që askush në Serbi nuk do ta bëjë këtë, por përderisa qëndrimi është i tillë, gjërat do të jenë ashtu siç janë. Është vetëm një çështje se sa kohë”, përfundon Groshelj.