Bashkimi Evropian (BE) dhe administrata amerikane po përpiqen me kujdes të injorojnë mashtrimet në zgjedhjet për Beogradin. Kështu ka thënë Daniel Serwer, profesor në Universitetin “Johns Hopkins” në Uashington.

“Ata nuk i kritikojnë shumë zgjedhjet në Serbi, të cilat nuk ishin të drejta dhe përpiqen t’i injorojnë”, ka thënë ai.

Duke folur për krizën paszgjedhore në Serbi, Serweri për në “N1” ka thënë se vëzhguesit ndërkombëtarë kanë konstatuar se rezultatet e zgjedhjeve nuk përputhen me vullnetin elektoral të votuesve.

Kur është pyetur nëse mendon se kjo do të dëmtojë pozicionin politik të Vuçiqit, Serweri ka thënë se dyshon në të.

“Proceset aktuale në Serbi dhe ajo që po ndodh është se Bashkimi Evropian, Komisioni, administrata amerikane po përpiqen me kujdes të injorojnë mashtrimet në zgjedhje”.

“Mendoj se po llogarisin tek Vuçiqi për të ofruar disa gjëra, siç është marrëveshja për targat në Kosovë. Ata janë të gatshëm të mbyllin sytë para shkeljeve të rënda të procesit demokratik dhe në këmbim të marrin hapat e vegjël përpara që bën Vuçiq”, ka vlerësuar Serweri.

Nëse pranohet premisa se Vuçiqi ka përqafuar Perëndimin, atëherë kjo është një politikë racionale dhe duhet pranuar, por sipas Serwerit, kjo nuk është e vërtetë.

“Ai (Vuçiq) iu drejtua Moskës dhe Pekinit. Injoron nevojën për të krijuar një shoqëri demokratike në Serbi. Ai nuk ka asgjë për të fituar nga demokracia në Serbi dhe nuk është gati ta organizojë atë”, ka thënë Serwer.

Administrata evropiane dhe amerikane e dinë këtë, thekson ai, por thekson se kanë zgjedhur të mbyllin sytë para kthesës së Vuçiqit drejt Lindjes në këmbim të disa gjërave të vogla, si targat, dhe nuk shohin alternativë.

“Por është e trishtueshme, sepse ka një alternativë në Beograd, për të luftuar përsëri. Por ata nuk janë gati të insistojnë, është një politikë e mbylljes së syve”, ka thënë ai.

Sipas tij, qytetarët e Serbisë mund të presin pak ndihmë nga Brukseli dhe Uashingtoni.

Në Uashington, siç ka thënë ai, problemet e Ballkanit janë të padukshme dhe kanë pak rezonancë politike.

“Sinqerisht, askush nuk beson se do të ketë një marrëveshje përfundimtare mes Kosovës dhe Serbisë para zgjedhjeve amerikane”, ka thënë ai.

Ai ka theksuar se është e mundur të kemi marrëdhënie të mira fqinjësore pa vendosur lidhje diplomatike dhe njohje, por për këtë duhet vullnet i mirë.

“Por ai vullnet i mirë nuk është aty. Politika në Beograd është rreptësisht antishqiptare, flitet në atë drejtim dhe nuk është drejtimi drejt Perëndimit”, ka thënë Serweri.