Ish-ministri i Tregtisë dhe Industrisë, zyrtar i lartë i Nismës Socialdemokrate, Endrit Shala ka reaguar pas një deklarate të ish-kryetarit të gjykatësve të EULEX-it, Malcolm Simmons ku tha se nuk ka marrë asnjë përgjigje nga kryeministri, Albin Kurti, në lidhje me letrën që ia ka dërguar atij para disa javësh, e në të cilën ka listuar një sërë skandalesh që sipas tij e kanë karakterizuar misionin evropian për sundimin e ligjit në Kosovë, EULEX.

Shala përmes një postimi në llogarinë e vet në “Facebook”, ka shkruar se Kurti sa ishte në kundërshtim të EULEX-it, rrotullonte edhe gjipat e tyre, kurse tash që është në pushtet nuk e merr mundin ta dëgjojë dikënd.

“Pushteti po e transformon!
Sa ishte në opozitë Albin Kurti ishte në kundërshtim të EULEX-it, rrotullonte edhe xhipat e tyre! Tash që është në pushtet nuk merr mundin madje as të dëgjojë dikend që flet hapur për padrejtësitë e EULEX-it! Hipokrizia vazhdon!”, ka shkruar Shala.