Kryetari i Komisionit Parlamentar për Ekonomi dhe deputeti i PDK-së, Ferat Shala, ka kritikuar ministrin e Financave, Hekuran Murati, duke theksuar se ai nuk ka përmbushur asnjë nga premtimet e dhëna gjatë fushatës.

“Është e vërtetë që qeveria, gjegjësisht ministri i Financave nuk ka përmbajtur asnjë premtim të dhënë gjatë fushatës së tij apo edhe në vazhdim”, ka thënë Shala.

Shala është shprehur se qeveria ka dështuar të ofrojë zgjidhje për problemin e furnizimit me arkë fiskale, duke theksuar se situata është përkeqësuar në vend që të përmirësohet.

Ai e ka akuzuar Muratin se përveç dështimeve në rregullimin e tregut, ka rritur tatimin mbi pronat e bizneseve, duke e bërë më të vështirë për to të funksionojnë.

“Ai jo vetëm që nuk i ka ndihmuar bizneset me zgjidhjen e problemit të furnizimit me arka fiskale dhe ndryshimin e metodologjisë së furnizimit, por ai e ka përkeqësuar gjendjen e bizneseve duke rritur tatimin në pronë për bizneset”, ka thënë Shala për “FrontOnline”.

Shala ka theksuar se qeveria nuk ka bërë asnjë përpjekje reale për të krijuar një ambient më të favorshëm për bizneset dhe përfundoi duke thënë se qeveria aktuale e ka vështirësuar mënyrën e të bërit biznes.

“Në esencë nuk është bërë asnjë përparësi reale që qytetarët ta gëzojnë dhe kjo qeveri e ka vështirësuar mënyrën e të bërit biznes dhe mënyrën e funksionimit të bizneseve”, ka thënë Shala.