Samiti ekonomik në Azi ka përfunduar pa ndonjë deklaratë nga liderët për shkak të luftës tregtare në mes të Shteteve të Bashkuara dhe Kinës.

Kryeministri i Papa Guinesë së Re, Peter O’neill, ka thënë se të dy fuqitë botërore nuk kanë arritur të pajtohen.

ShBA-ja dhe Kina janë në luftë tregtare dhe kanë qëndrime të kundërta për rajonin të cilat i kanë shfaqur edhe në samit.

Gjatë samitit, zëvendëspresidenti amerikan, Mike Pence, ka thënë se ShBA-ja do t’i bashkohej Australisë në ndërtimin e një baze detare në Papa Guinenë e re, për të penguar influencën kineze në rritje si dhe për të mbrojtur sovranitetin.

Presidenti i Kinës, Xi Jinping, ka deklaruar se shtetet që mbrojnë produktet nga konkurrenca janë të prirura të dështojnë.

Pence më vonë tha se ishte i gatshëm të “dyfishonte” tarifat e vendosura mbi mallrat kineze.

Shtëpia e Bardhë muaj më pare kishte njoftuar se Shtetet e Bashkuara do të ashpërsojnë masat në luftën tregtare me Kinën, duke aplikuar tarifa prej 10 për qind në mallrat kineze në vlerë të 200 miliardë dollarëve.

Vala e re e tarifave është masë, e cila pritet të rezultojë me përshkallëzim të madh të konfliktit tregtar. (Rel)