ShBA-ja duhet të shtojë angazhimin në Ballkan
Shtetet e Bashkuara duhet të shtojnë angazhimin e tyre në Ballkanin Perëndimor nëse duan t’i bëjnë ballë ndikimit kinez dhe rus në rajon. Kështu ka thënë ish presidentja e Kroacisë, Kolinda Grabar-Kitaroviq.
Ajo ka qenë presidente e Kroacisë nga viti 2015 deri më 2020.
Gjatë një diskutimi të organizuar nga Instituti Hoover i Universitetit të Stanfordit, Kitaroviq, kritikoi edhe Bashkimin Evropian për vonesa në procesin e integrimit të këtyre vendeve.
“Nëse vërtetë dëshironi që të parandaloni të tjerët nga ndërhyrja, atëherë duhet që vetë të përfshiheni”, ka thënë Grabar-Kitaroviq, duke iu referuar Shteteve të Bashkuara.
Ajo ka shprehur zhgënjimin për siç tha “një lloj mungese të interesimit për rajonin e Ballkanit” nga administratat e presidentit, Donald Trump dhe paraardhësit të tij Barack Obama.
Uashingtoni dhe Brukseli kanë bërë përpjekje për integrimin e vendeve të Ballkanit Perëndimor në Bashkimin Evropian (BE) dhe NATO në mënyrë që të sigurojnë stabilitet në një rajonin që u përfshi në luftra etnike në vitet 1990.
Grabar-Kitaroviq ka thënë se ky proces ka qenë “shumë i ngadaltë” dhe se “po krijon një hapësirë që po mbushet nga forcat e treta”, një referencë e mundshme për Kinën dhe Rusinë.
