Shtetet e Bashkuara të Amerikës (ShBA) kanë reaguar menjëherë pas deklaratës së bërë nga Milorad Dodik, i cili ka paralajmëruar shkëputjen e Republikës Sërpska dhe bashkimin me Serbinë.

“Shtetet e Bashkuara do të mbrojnë Bosnjën dhe Hercegovinën dhe do të sigurojnë që ajo të ruajë sovranitetin, integritetin territorial dhe karakterin multietnik”, është thënë në reagimin në “Twitter” të Ambasadës së ShBA-së në Bosnje Hercegovinë.

Dodiku u ka bërë thirrje përfaqësuesve të shteteve perëndimore që të pranojnë qëndrimin se serbët nga Republika Sërpska “nuk mund të jetojnë në Bosnjë e Hercegovinë”, sepse, siç ka thënë ai, “koncepti i shtetësisë në Bosnje është një projekt anti-serb, që synon të eliminojë popullsinë serbe nga këto zona”.

“Ne jemi këtu nga Republika Sërpska sepse i takojmë një kombi dhe një ditë ne do të jemi një shtet. Askush nuk do të na ndalojë që ta bëjmë këtë sepse është e drejta jonë dhe historia jonë. Shekulli i kaluar ishte shekulli i vuajtjes serbe dhe ky shekull do të jetë shekull i bashkimit të serbëve”, ka thënë Dodiku, raporton “Beta”.

Në reagimin e saj ambasada amerikane janë renditur edhe disa fakte për të kundërshtuar Dodikun.

“Republika Sërpska është një entitet në BiH. Ai nuk ekziston jashtë Bosnje-Hercegovinës dhe nuk ka të drejtë sipas kushtetutës së BiH që një ent ose ndonjë njësi tjetër nënshtetërore të shkëputet ose të bashkohet me një shtet tjetër. Milorad Dodik e ka gabim nëse mendon se Shtetet e Bashkuara do të tërhiqen ndërsa ai e shtyn BiH drejt konfliktit. Shtetet e Bashkuara do të mbrojnë Bosnjën dhe Hercegovinën dhe do të sigurojnë që ajo të ruajë sovranitetin, integritetin territorial dhe karakterin multietnik”, është thënë në reagimin e Ambasadës së ShBA-së në Bosnjë Hercegovinë.