Shteti afrikan i Kenias, më 26 mars ka vendosur të njohë Kosovën shtet të pavarur dhe sovran.

Ky vendim është bërë me dije nga ish-presidenti i vendit, Behgjet Pacolli, i cili edhe ka publikuar fotografitë nga nënshkrimi i vendimit nga presidenti i Kenias, William Ruto.

Veprimi i shtetit afrikan është pritur me reagime të ashpra nga shteti serb, i cili ka kohë që ka nisur një fushatë agresive kundër shtetit të Kosovës, duke penguar njohjet e reja dhe duke tentuar të bind shtete që e kanë njohur mëvetësinë e Kosovës që ta zhbëjnë atë.

E për Shtetet e Bashkuara të Amerikës (ShBA), qasja e Serbisë nuk e ndryshon qëndrimin e tyre.

Një zëdhënës i Ambasadës së ShBA-së në Kosovë, për “Klankosova.tv” ka thënë se ShBA-ja ka kohë që mbështet rrugëtimin e Kosovës.

“Shtetet e Bashkuara ka kohë që kanë mbështetur rrugëtimin e Kosovës për t’u bërë vend sovran, demokratik, multi-etnik dhe me prosperitet”, ka thënë një zëdhënës i Ambasadës së ShBA-së në Prishtinë.