Departamenti Amerikan i Shtetit (DASh) ka miratuar shitjen e mundshme të armëve prej më shumë se 5 miliardë dollarësh për Egjiptin.

Sipas mediave të huaja, Departamenti i Shtetit ka informuar Kongresin të premten se kishte miratuar shitjen e pajisjeve me vlerë 4.69 miliardë dollarë për 555 tanke “M1A1 Abrams” të prodhuara në ShBA, të operuara nga Egjipti, së bashku me 630 milionë dollarë raketa ajër-tokë “Hellfire”.

Në një deklaratë të lëshuar atë ditë, DASh-i ka theksuar se shitja do të mbështeste “politikën e jashtme dhe sigurinë kombëtare” të ShBA-së, duke ndihmuar në përmirësimin e sigurisë së një aleati “të madh” jo-NATO që kishte vepruar si një partner i rëndësishëm strategjik në Lindjen e Mesme.

Egjipti dhe ShBA-ja kanë punuar gjithnjë e më ngushtë që nga shpërthimi i luftës në Gaza në tetor 2023, me Kajron që luan një rol në negocimin e armëpushimit.

Marrëveshjet vijnë përkundër shqetësimit të vazhdueshëm në Uashington mbi të dhënat e dobëta të qeverisë egjiptiane për të drejtat e njeriut nën presidentin Abdel Fattah el-Sisi.

Grupi i të drejtave Amnesty ka vlerësuar e Egjipti aktualisht mban rreth 60 000 të burgosur politikë, duke përfshirë aktivistin britaniko-egjiptian Alaa Abd El-Fattah, të burgosur për “përhapje të lajmeve të rreme” pasi ndau një postim në Facebook për brutalitetin e dyshuar të policisë.

Egjipti ka falur në dy vitet e fundit qindra të burgosur politikë. Por grupet e të drejtave kanë thënë se gjatë së njëjtës periudhë, janë arrestuar të paktën tre herë më shumë njerëz