Shtetet e Bashkuara nuk e kanë ndërprerë ndihmën ushtarake për Ukrainën pasi sekretari amerikan i shtetit, Marco Rubio, i sapobetuar, njoftoi se do të ndalonte grantet e ndihmës së huaj për 90 ditë, tha të shtunën presidenti ukrainas Volodymyr Zelenskyy.

Udhëheqësi ukrainas nuk sqaroi nëse ndihma humanitare ishte ndërprerë. Ukraina mbështetet në SHBA-në për 40% të nevojave të saj ushtarake, shkruan The Guardian, transmeton Gazeta Express.

“Jam i fokusuar te ndihma ushtarake; nuk është ndalur, shyqyr Zotit”, tha ai në një konferencë shtypi së bashku me presidenten moldave Maia Sandu.

Zelenskyy tha se Ukraina ishte gati t’i ofronte qymyr Moldavisë, e cila është përfshirë nga një krizë energjetike pasi rrjedhjet e gazit rus përmes Ukrainës u ndaluan në vitin e ri.

Moldavia akuzon Moskën për refuzimin e dërgimit të gazit me rrugë të tjera.

Presidenti amerikan Donald Trump mund të përmbushë premtimin e tij për t’i dhënë fund luftës në Ukrainë, por vetëm nëse ai përfshin Kievin në ndonjë bisedë, tha Zelenskyy të shtunën.

Zelenskyy tha gjithashtu se kushtet e çdo marrëveshjeje që mund të lindte nën Trump ishin ende të paqarta – dhe mund të mos ishin të qarta as për vetë Trump – sepse presidenti rus Vladimir Putin nuk kishte asnjë interes për t’i dhënë fund luftës.

Putini ka thënë se është “gati për negociata” mbi luftën në Ukrainë me Trump dhe sugjeroi se do të ishte një ide e mirë që ata të takoheshin.