Sekretari i Përgjithshëm i Kombeve të Bashkuara, Antonio Guterres, ka thënë se Lufta e Ftohtë është kthyer me hak.

“Lufta e Ftohtë është kthyer me hak, por me një ndryshim. Mekanizmat dhe masat mbrojtëse për të menaxhuar rreziqet e përshkallëzimit, që kanë ekzistuar në të kaluarën, nuk duken më të pranishme”, ka thënë shefi i OKB-së.

Duke folur në Këshillin e Sigurimit të Kombeve të Bashkuara, Guterres paralajmëroi edhe për rrezikun e përshkallëzimit të situatës në Siri.

Shtetet e Bashkuara dhe aleatët e tyre janë duke shqyrtuar mundësinë e sulmeve ajrore në Siri, pas një sulmi të dyshuar kimik në qytetin Duma.

Dhjetëra njerëz kanë humbur jetën nga sulmi i 7 prillit në zonën e kontrolluar nga rebelët.

Rusia, e cila ka trupa në Siri, ka deklaruar se Britania e ka falsifikuar sulmin.

Britania ka thënë se akuza është një “gënjeshtër groteske”.

Rusia po ashtu paralajmëroi se sulmet ajrore të Perëndimit në Siri do të rrezikonin luftën midis dy palëve.