Ukraina ka ndaluar një komplot të supozuar për të përmbysur qeverinë që “do të kishte luajtur në duart e Rusisë”, kanë thënë zyrtarët e sigurisë në vendin e shkatërruar nga lufta.

Në një postim në “Telegram”, Shërbimi i Sigurisë së Ukrainës (SBU), ka pretenduar se organizatorët e dyshuar të grushtit të shtetit kishin planifikuar të shkaktonin një trazirë në Kiev më 30 qershor, si një shpërqendrim për të marrë kontrollin e parlamentit ukrainas dhe për të hequr udhëheqjen ushtarake dhe politike nga pushteti.

Është e paqartë nëse të akuzuarit kanë ndonjë lidhje me Rusinë, e cila ka kryer një pushtim shkatërrues në shkallë të plotë kundër fqinjit të saj jugperëndimor për gati dy vjet e gjysmë.

Katër të dyshuar janë identifikuar, me dy të mbajtur në paraburgim, ka njoftuar SBU-ja. Ata do të përballen me 10 vjet burgim nëse shpallen fajtorë. SBU-ja ka bërë me dije se ka sekuestruar armë dhe municione, si dhe telefona celularë, kompjuterë dhe të dhëna të tjera “me prova të veprimeve kriminale”.

Sipas prokurorisë së përgjithshme të Ukrainës, udhëheqësi i supozuar i grushtit të shtetit ka marrë me qira një sallë me një kapacitet prej 2 mijë personash dhe ka rekrutuar personel ushtarak dhe roje të armatosura nga kompani private për të “kryer kapjen” e Parlamentit. Është e paqartë nëse prokurorët po kërkojnë të dyshuar të tjerë.

“Për të zbatuar planin kriminal, organizatori kryesor përfshiu disa bashkëpunëtorë – përfaqësues të organizatave të komunitetit nga Kievi, Dnipro dhe rajone të tjera”, ka thënë SBU-j.

Skema e supozuar në Kiev vjen pasi Rusia ka bërë fitime të ngadalta, por të qëndrueshme në fushën e betejës muajt e fundit, duke shfrytëzuar fuqinë punëtore të zvogëluar të Ukrainës dhe mbështetjen në Perëndim për armë – dhe pasigurinë mbi të ardhmen e asaj ndihme ushtarake.

Forcat ruse kanë vrarë shtatë persona, përfshirë tre fëmijë, në një sulm me raketa në qytetin jugor të Vilniansk të shtunën, sipas zyrtarëve ukrainas, duke bërë që presidenti Volodymyr Zelensky të apelojë për më shumë armë me rreze të gjatë. /Albanian Post