Sulmuesi Alban Shillova është rikthyer nga lëndimi dhe është paraqitur rreth 25 minuta lojë në ndeshjen kundër Gjilanit. Sulmuesi pati një rast ideal që të shënojë gol, por gjuajtja e tij u ndalua nga portieri në formë të mirë, Enea Koliçi.

Shillova është shprehur i kënaqur që është rikthyer, por është i zhgënjyer me humbjen e pësuar.

“U ndjeva shumë mirë që u ktheva sërish në fushë, megjithëse kthimin e prisja edhe më herët, por lëndimi e bëri të veten. Gjithsesi do të ndihesha edhe më mirë dhe jo i zhgënjyer sikur do të përfundonte rezultati ndryshe nga ai që përfundoi. Pata një rast ideal, por portieri Koliçi ishte thjesht i pamposhtur”, ka thënë Shillova për faqen zyrtare të klubit kryeqytetas.

“Tani na pret ndeshja të mërkurën me Ballkanin. Mision i vështirë, por jo i paarritshëm. Ne shkojmë për pikët e plota për çka kam besim të plotë në grupin e lojtarëve që kemi pasi këtë gjë e kanë dëshmuar me lojë. Neve na duhet të na përcjellë pak edhe fati më shumë, sidomos më shumë sesa në ndeshjen e djeshme”, ka shtuar Shillova.

(Epoka e re)