Agjencia për Mbrojtjen e Mjedisit të Kosovës (AMMK) ka njoftuar se problemet e paraqitura ditëve të fundit në sistemin elektrik të ndriçimit në monumentit e natyrës me rëndësi të veçantë Shpella e Gadimes, si pasojë e vërshimeve dhe defekteve me kabllot e furnizimit me rrymë janë evituar.

AMMK-ja ka bërë me dije se që nga dita e hënë Shpella e Gadimes është e hapur për vizitorë. Problemet u evituan pas angazhimit të një kompanie profesionale nga AMMK-ja, e cila ka identifikuar problemet dhe i ka evituar defektet.

Agjencia për Mbrojtjen e Mjedisit të Kosovës, si organ menaxhues i Monumentit të Natyrës me Rëndësi të Veçantë “Shpella e Gadimes”, u ka kërkuar falje të gjithë vizitorëve që kanë planifikuar të realizojnë vizita gjatë kësaj periudhe kohore dhe i njofton që tani e tutje Shpella e Gadimes do të jetë e hapur dhe e sigurt për të mirëpritur vizitorët e saj.

“Kërkojmë mirëkuptim nga të gjithë vizitorët për mbylljen e përkohshme të shpellës, dhe njëherësh ju bëjmë me dije që kushtet brenda shpellës janë specifike dhe kërkojnë mirëmbajte të vazhdueshme të rrjetit elektrik në shpellë, andaj mbyllja e përkohshme e shpellës në këto raste është e paevitueshme”, thuhet në njoftimin e AMMK-së.