Komisioni Qendror i Zgjedhjeve (KQZ) ka publikuar raportet financiare për tremujorin e tretë të vitit për partitë politike në Kosovë.

Sipas raporteve të publikuara nga KQZ-ja, për shpenzime nga muaji korrik deri në shtator prin Lëvizja Vetëvendosje me 330 mijë e 599.3 euro.

E dyta për nga shpenzimet është Partia Demokratike e Kosovës me 164 mijë e 358.7 euro, pasuar nga Lidhja Demokratike e Kosovës me 142 mijë e 421.05 euro dhe Aleanca për Ardhmërinë e Kosovës me 61 mijë e 666.25 euro.

Shpenzimet më të mëdha, LV-ja i ka pasur për paga dhe mëditje, ku për to ka shpenzuar mbi 193 mijë e 472 euro, ndërsa për qira të zyrave shpenzoi 54 mijë e 291 euro, teksa për shpenzime komunale, telefon dhe internet shpenzoi 6 mijë e 514 euro. Në total për kategorinë e “shpenzimeve të përgjithshme”, LV-ja ka shpenzuar 254 mijë e 378 euro.

Për shpenzimet e transportit, LV-ja ka shpenzuar 13 mijë e 619 euro, ndërsa për blerje të mallrave ka shpenzuar i 44 mijë e 220 euro.

Partia në pushtet ka pasur edhe shpenzime të përfaqësimit, ku për këtë kategori ka shpenzuar 12 mijë e 410 euro, ndërsa për investime dhe logjistikë ka shpenzuar vetëm 339 euro, teksa në kategorinë “shpenzime të tjera”, LV-ja i ka dhënë 5 mijë e 630 euro.

Edhe për Partinë Demokratike të Kosovës, shpenzimet më të mëdha gjatë tremujorit të tretë shpenzimet më të mëdha ishin në paga, ku për këtë kategori i shpenzoi 141 mijë e 28 euro.

Për mallra dhe shërbime, PDK-ja pagoi 19 mijë e 508 euro, ndërsa për shpenzime të udhëtimit, partia më e madhe opozitare pagoi 4 mijë e 930 euro.

Shpenzimet për shërbime, PDK-së i kanë kushtuar 3 mijë e 615 euro, kurse ato për blerje të tjera të mallrave dhe shërbimeve patën koston e 3 mijë e 661 eurove.

1 mijë e 200 euro, PDK-ja i ka shpenzuar edhe për kategorinë “llogaritë përllogaritëse për avance”, për shërbime të regjistrimit dhe sigurimeve 375 euro, për mirëmbajtje dhe riparime të tjera 1 mijë e 463 euro, ndërsa për qira u dhanë 1 mijë e 453 euro.

Për dreka zyrtare, PDK-ja ka shpenzuar 2 mijë e 827 euro, kurse për shpenzime komunale 2 mijë e 983 euro, teksa për shpenzime komunale dhe shpenzime të ndryshme 739 euro.
Gjithashtu edhe LDK-ja përgjatë tre muajve të fundit më së shumti ka shpenzuar për paga, ku ka dhënë 88 mijë e 759 euro, ndërsa mallrat dhe shërbimet gjatë muajve korrik, gusht dhe shtator i kanë kushtuar 52 mijë e 954 euro.

Për shpenzime dhe shërbime, LDK-ja i ka dhënë 40 mijë e 298 euro, ndërsa për shërbimet e telekomunikimit 853 euro.

Lëndët djegëse dhe blerjet e tjera të mallrave dhe shërbimeve, LDK-së i kanë 3 mijë e 647 euro, respektivisht 1 mijë e 634 euro.

Llogaritë përllogaritëse për avance te LDK-ja kanë pasur koston e 1 mijë e 128 eurove, ndërsa shërbimeve e regjistrimit dhe sigurimit 647 euro, ndërsa për mirëmbajtje dhe riparime të tjera u dhanë 169 euro.

Qiraja për zyrat e LDK-së ka kushtuar 4 mijë e 576 euro, ndërsa shpenzimet komunale 706 euro.

Më së paku shpenzime për tremujorin e tretë ka pasur AAK-ja, ku më së shumti para janë dhënë për paga, 48 mijë e 162 euro.

Për shpenzime dhe shërbime, AAK-ja ja shpenzuar 1 mijë e 433 euro, ndërsa për blerje të mallrave dhe shërbimeve 2 mijë e 136 euro.

Shpenzime pa kategori, AAK-ja ka pasur 8 mijë e 25 euro, ndërsa për shpenzime komunale 1 mijë e 908 euro.