Në shenjë solidariteti me familjet me gjendje të rëndë ekonomike dhe sociale, të martën organizata “Islamic Relief Kosova”, tashmë e njohur me aktivitetet e saj humanitare, në bashkëpunim dhe koordinim me Drejtorinë e Shëndetësisë, konkretisht me Qendrën për Punë Sociale në Gjilan, kanë shpërndarë 150 pako ushqimore.

Me këtë rast, drejtori i Shëndetësisë në Gjilan, Selami Xhemaili, ka falënderuar organizatën për këtë donacion, i cili sipas tij është i mirëseardhur për familjet në gjendje të rëndë sociale.

“Falënderoj organizatën e cila ka sjellë këto pako ushqimore për familjet në nevojë. Jemi duke punuar vazhdimisht për ndryshimin e gjendjes në mënyrë që rastet të cilat kanë mungesën e ushqimit në sofër, të jenë përditë e më pak”, ka thënë Xhemaili.

Kurse, Blerim Gashi, në emër të organizatës “Islamic Relief Kosova”, ka thënë se janë duke bërë shpërndarjen e pakove ushqimore për 150 familje, prej tyre 120 që janë përzgjedhur nga Qendra për Punë Sociale dhe 30 familje i ka përzgjedhur organizata, të cilët kanë jetimë në familje.

/Epoka e re/