I dërguari i Shteteve të Bashkuara të Amerikës për Ballkanin Perëndimor, Gabriel Escobar, ka thënë se masat e vendosura nga Bashkimi Evropian ndaj Kosovës janë duke pasur ndikim në Kosovë dhe në ekonominë e saj.

Escobari ka deklaruar se shpreson se ShBA-ja do të mund të punojë me Kosovën për të gjetur një mënyrë për t’i hequr ato masa në vitin 2024.

Sipas Escobarit, nëse Kosova nuk angazhohet me Bashkimin Evropian, kjo do të ndikojë në procesin integrues.

“Nuk do të thosha masa. Do të thosha pasoja. Tani, ju them se pasojat, me të cilat ballafaqohet Kosova, është se nëse ata refuzojnë të angazhohen me Bashkimin Evropian, Bashkimi Evropian nuk do të angazhohet për ndihmë shtesë dhe masa shtesë për integrim. Shikoni, unë mendoj se këto masa janë duke pasur ndikim në Kosovë dhe në ekonominë e Kosovës. Shpresoj që të paktën në mënyrë bilaterale, Shtetet e Bashkuara të mund të punojnë me Kosovën për të gjetur një mënyrë për t’i hequr ato masa në vitin 2024. Kështu që, ne do të vazhdojmë të punojmë me Kosovën për ta afruar me Bashkimin Evropian. Por, ne do të kishim dëshirë të shihnim një vullnet politik dhe lëvizje në atë drejtim, gjithashtu”, ka deklaruar Escobar në një intervistë për Radion Evropa e Lirë.

I pyetur nëse ka një afat për heqjen e këtyre masave, Escobari ka thënë se “jo” pasi, sipas tij, “këto masa janë të pacaktuara derisa të ketë një lëvizje drejt progresit si në [Marrëveshjen e] Ohrit, ashtu edhe në një plan shtensionimi”.