Kryetari i Odës së Mjekëve, Pleurat Sejdiu, ka bërë me dije se deri më tani 151 mjekë i kanë kërkuar dokumentet e nevojshme të cilat u duhen për të lidhur kontrata pune në shtete tjera apo oda të mjekëve në shtete perëndimore.

Sejdiu ka thënë për “Tëvë1” se trendi i filluar 2-3 vite më parë me largimin e mjekëve nga sistemi shëndetësor në Kosovë po vazhdon njëjtë, derisa ka theksuar se nga 1 janari i vitit të ardhshëm ky numër mund të rritet.

“Sa i përket migrimit të brendshëm dhe të jashtëm, ai i brendshëm është ndalë pak, kurse ai i largimit, sidomos i anesteziologëve, jashtë Kosovës, të mjekëve të rinj pak a shumë mbetet trendi i njëjtë sikurse i 2-3 viteve të kaluara. Ne kemi shifra vetëm për mjekët dhe deri më tani 151 mjekë i kanë marrë dokumentet për lidhje kontrate në shtetet ku do të shkojnë të punojnë dhe anëtarësuar në odat respektive që është obligim ligjor dhe ky numër tani disa mund të kenë vetëm të jenë larguar dhe një pjesë me siguri janë në proces të largimit dhe nënshkrimit të kontratave por në përgjithësi kjo lëvizje mund të kalojnë një pjesë të largohen vitin e ardhshëm por ky është një numër i cili është duke vazhduar ky trend. Frika jonë është që me liberalizimin e vizave, me shumë lehtësime për bashkime familjare do të jetë një disavantazh për ne”, ka thënë Sejdiu.