Njëri ndër avokatët më të rëndësishëm të Rexhep Selimit, David Young, është larguar nga ekipi mbrojtës. Lajmi është bërë me dije në faqen zyrtare të Speciales.

Bashkëshortja e Rexhep Selimit, deputetja Shqipe Selimi, ka treguar arsyen e largimit të këtij avokati.

Sipas saj, Young është liruar nga detyra për shkak të problemeve shëndetësore.

“Sqarim për publikun. E shkruaj këtë sqarim, në lidhje me lajmet e fundit që po qarkullojnë në media se njëri nga avokatët në ekipin e Rexhep Selimit është larguar nga ekipi. Një gjë e tillë është e vërtetë, por nuk ka të bëjë asgjë me çështje financiare, por me çështje shëndetësore të avokatit David Young. Ekipi i Rexhep Selimit vazhdon punën si gjithmonë, të përkushtuar ndaj të drejtës dhe fitores. E falënderoj avokatin Young për punën e palodhshme në mbrojtje të Rexhës”, ka shkruar në “Facebook” Shqipe Selimi.