Shtetet jugore të Bashkimit Evropian (BE) kanë bërë me dije se do të hartojnë një listë të sanksioneve kundër Turqisë, nëse Ankaraja nuk vjen në tryezën e negociatave për të zgjidhur një mosmarrëveshje territoriale me Greqinë dhe Qipron.

Paralajmërimi është bërë të enjten vonë, pas një samiti joformal të të ashtuquajturit grup MED7, i kryesuar nga presidenti i Francës, Emmanuel Macron.

Greqia dhe Qiproja janë në mosmarrëveshje me Ankaranë rreth rezervave të gazit natyror dhe kufijve detarë.

Turqia ka thënë se ka të drejtë për të kërkuar gaz në zonat që dy vendet e BE-së thonë se janë pjesë e zonave të tyre ekskluzive ekonomike.

Grupi MED7, që përfshin shtetet me vija bregdetare mesdhetare, tha përmes një deklarate të përbashkët se shpreh “mbështetje dhe solidaritet të plotë me Qipron dhe Greqinë, përballë shkeljeve të përsëritura të sovranitetit të tyre, si dhe veprimeve konfrontuese të Turqisë”.

Pozicioni i MED7 nuk pasqyron domosdoshmërisht qëndrimin e BE-së si tërësi.

Macroni ka thënë se problemi nuk qëndron te populli turk, por te Qeveria e presidentit Rexhep Taip Erdogan.

Omer Celik, zëdhënës i partisë së Erdoganit, ka shkruar në “Twitter” se Macroni po shfaq një qëndrim “kolonialist”.

Turqia ka shprehur dëshirë për t’u bashkuar me BE-në gjatë pesë dekadave të fundit, por analistët thonë se numri në rritje i mosmarrëveshjeve midis Erdoganit dhe udhëheqësve të bllokut i ka zbehur këto perspektiva.