Sipas drejtoreshës së Qendrës së Laboratorëve Testues, Drita Zogaj, kohëve të fundit janë shtuar mostrat e mishit që shkojnë për analiza në këta laboratorë.

Zogaj ka thënë për “Kallxo.com” se nga viti 2012 ka pasur rënie të dërgimit të mostrave në këtë qendër, por në tre muajt e fundit këto mostra janë shtuar.

Zogaj ka treguar se në tre muajt e fundit në Qendrën e Laboratorëve Testues që funksionon në kuadër të Institutit Kombëtar të Shëndetësisë Publike janë dërguar 113 mostra ushqimesh, 38 prej tyre nga Agjencia e Ushqimit dhe Veterinarisë.

Ajo ka bërë me dije se në Qendrën e Laboratorëve në këtë kohë kanë ardhur më shumë mostra të mishit. “21 mostra ushqimore të AUV-it janë produkte të mishit”, ka thënë Zogaj.

Në mars shpërtheu skandali i mishit nga Belgjika kur në këtë shtet një kompani që kishte importuar mish edhe në Kosovë u mbyll për shkak të kushteve johigjienike të mbajtjes së mishit,

Njërit prej importuesve të këtij mishi në Kosovë i është caktuar paraburgimi prej 30 ditësh.

E pyetur se çfarë kërkohet më së shpeshti nga analiza e mostrave të mishit, drejtoresha Zogaj ka thënë se më shumti kërkohet që të vërtetohet nëse ky mish është i freskët.