Kampioni i Kosovës, Ballkani, është afër përsëritjes së historisë – kualifikimi në fazën e grupeve në Ligën e Konferencës. Ballkani i Ilir Dajës shënoi fitore mbrëmë ndaj Bate Borisovit me rezultat 4:1.

Therndasit ndodhen vetëm një fitore larg për të arritur edhe njëherë nivelin më të lartë që ka arritur një klub kosovar, fazën e grupeve në një garë evropiane.

Përpos prestigjit që do të arrijë Ballkani, pjesëmarrja në grupet e Ligës së Konferencës shpërblehet edhe me para. Plotë 2.94 milionë euro do të përfitojë Ballkani në rast se arrin kualifikimin në fazën e grupeve, një shifër kjo goxha e konsiderueshme.

Ndërkohë, për çdo fitore në ndeshjet e grupeve, shpërblimi është 500 mijë euro, ndërsa barazimi në grupet e Ligës së Konferencës vlen 166 mijë euro.

Shifra këto që do të kishin një ndikim të madh në arkat e klubit nga Suhareka që do të fuqizoheshin ndjeshëm për sezonet në vijim.