Kreu i Gazprom pranoi të mërkurën se gjiganti rus i energjisë kishte përjetuar një vit sfidues pasi kompania kërkonte vazhdimisht tregje të reja pas vendosjes së sanksioneve ndërkombëtare ndaj Rusisë për pushtimin në Ukrainë.

“Dua të them menjëherë se viti 2022, natyrisht, ka rezultuar shumë, shumë i vështirë”, tha Alexei Miller gjatë një konference të fundvitit.

Miller vuri në dukje një “ndryshim total në tregjet e energjisë” i nxitur nga pasojat e sanksioneve perëndimore ndaj Moskës në përgjigje të vendimit të presidentit rus, Vladimir Putin për të dërguar trupa në Ukrainë.

Ai këmbënguli, megjithatë, se Gazprom vazhdon të operojë “shumë mirë”, raporton moscowtimes.

Në vitin 2021, Rusia ishte furnizuesi më i madh i gazit i Bashkimit Evropian, por blloku reduktoi në mënyrë drastike importet nga shteti rus në një përpjekje për të hequr dorë nga blerja e energjisë pas fillimit të konfliktit në Ukrainë.

Humbja e tregjeve të zakonshme në Evropë ka bërë që Gazprom të kërkojë tregje alternative, veçanërisht në Azi.

Ndryshe, Gazprom përbën 11 për qind të prodhimit global të gazit natyror dhe ka rezervat më të mëdha të gazit në botë.