Trajneri i Atlético Madrid, Diego Simeone, siguroi këtë të hënë se skuadra e tij është gati për përballjen në Kupën e Mbretit kundër Barcelonës, duke ditur se do të duhet të përballojë presionin e kundërshtarit.

“Barcelona? Kur përballesh me skuadra të mëdha, e di që duhet të jesh i përgatitur për të rezistuar. Do të ketë momente të mira, e pamë edhe kundër Real Madridit, ku kishte periudha kur ata ishin më të mirë se ne… E dimë që gjatë ndeshjes do të ketë faza të ndryshme dhe shpresojmë që të kemi më shumë momente pozitive për veten tonë. Duhet të jemi të vendosur dhe të saktë”, theksoi ai në konferencën për shtyp.

Sa i përket strategjisë ndaj Barcelonës, trajneri argjentinas u shpreh: “Kemi një ide të qartë dhe do ta diskutojmë me lojtarët. Po përballemi me një kundërshtar që më pëlqen shumë për mënyrën se si luan. Ka një forcë të madhe sulmuese dhe do të përpiqemi ta dëmtojmë aty ku besojmë se është e mundur”.

“Jemi të motivuar, të entuziazmuar dhe me dëshirë për të garuar. Do të përballemi me çdo kompeticion dhe ndeshje në mënyrën më të mirë të mundshme,” tha Simeone, para se të pyetej për Lamine Yamal, talent i Barcelonës, i cili nuk u bashkua me shokët e tij të skuadrës në stërvitjen e fundit përpara ndeshjes.

“Nuk do të flas për secilin lojtar të kundërshtarit. Ata kanë lojtarë vendimtarë, janë në një moment shumë të mirë në aspektin sulmues dhe, pavarësisht se kush luan, arrijnë të zgjidhin situatat shumë mirë”, theksoi ai.

Atlético Madrid është kundërshtari i parafundit i Barcelonës para se skuadra katalanase të përballet me Benfikën, më 5 maj, në “Da Luz”, për ndeshjen e parë të 1/8-ve të Ligës së Kampionëve.