Situata në veri, KFOR-i bën vëzhgime nga helikopteri
Dy ditë pas sulmeve terroriste ndaj Policisë së Kosovës në veri, gjendja atje raportohet të jetë e qetë.
Policia e Kosovës së bashku me KFOR-in po vazhdojnë të jenë prezentë, ndërsa KFOR-i po vëzhgon situatën edhe me helikopter.
Në fshatin Banjskë të Zveçanit më 24 shtator ndodhën sulme terroriste ndaj Policisë së Kosovës, ku u vra polici Afrim Bunjaku, u plagos polici Alban Rashiti si dhe u lëndua një tjetër.
Pas kësaj Policia e Kosovës reagoi duke kërkuar nga terroristët të dorëzohen, ata refuzuan të dorëzohen duke vazhduar sulmet me armë ndaj policisë. Nga gjuajtjet me armë zjarri, tre terroristë u vranë, dy janë arrestuar, dhe katër persona tjerë janë arrestuar për përfshirje.
Lidhur me sulmet terroriste, Policia ka sekuestruar arsenal armësh në Zveçan, të cilat u publikuan gjatë ditës së hënë.