Krerët e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi e Jakup Krasniqi, për gati tri vjet po mbahen në paraburgim në Hagë nga Gjykata Speciale. Deri vonë, një nga arsyet kryesore për vazhdimin e kësaj mase ka qenë edhe rreziku i ikjes.

Megjithatë, në një vendim të fundit të trupit gjykues në Hagë, është rrëzuar ky arsyetim i Prokurorisë. Sipas Gjykatës Speciale, rreziku i arratisjes nuk qëndron më si arsyetim në këtë kohë.

Megjithatë, paraburgimi është vazhduar për shkak të rrezikut të ndikimit në prova, dëshmitarë dhe fuqisë së katërshes së UÇK-së në Kosovë.

Rënia e arsyetimit të arratisjes është bërë e ditur në disa parashtrime që janë publikuar deri më tash, raporton gazeta Nacionale.

“Paneli ka shqyrtuar argumentet e Prokurorisë në dritën e fazës aktuale të procedurës, dhe përderisa rreziku i arratisjes nuk mund të përjashtohet kurrë plotësisht, ai ripohon se nuk gjen ndonjë faktor shtesë mjaftueshëm bindës për të bindur Panelin të ndryshojë vendimin e mëparshëm në lidhje me rrezikun e fluturimit. Prandaj, Paneli konstaton se vazhdimi i ndalimit të z. Veseli mund të mos justifikohet në këtë moment për shkak të rrezikut të ikjes në pajtim me nenin 41(6)(b)(i)”, thuhet në këtë vendim.

Trupi gjykues e ka rrëzuar edhe një pikë të Prokurorisë, ku këta të fundit e përmendin dënimin e Salih Mustafës si argument për vazhdimin e paraburgimit.

“Në lidhje me argumentin e Prokurorisë se aktgjykimi në rastin Prokurori kundër Salih Mustafa do të rriste perceptimin e z. Veseli për mundësinë e një dënimi më të gjatë për veten e tij, Paneli e konsideron këtë si spekulative. ZPS-ja nuk ka demonstruar se ky faktor tejkalon faktorët e tjerë që Paneli i ka marrë parasysh në vendimet e tij të mëparshme. Në çdo rast, z. Veseli prezumohet të jetë i pafajshëm”, thuhet në këtë vendim.

Këto vendime kanë vlejtur edhe për të akuzuarit e tjerë si Thaçi, Krasniqi e Selimi, jo vetëm për Kadri Veselin.

Megjithatë, Prokuroria e Hagës edhe në kërkesën e fundit për caktim të paraburgimit, sërish e ka përmendur rrezikun e ikjes. Pra, ka insistuar në këtë argument edhe pse i është rrëzuar dy herë nga trupi gjykues.

“Veseli është i vetëdijshëm për akuzat e rënda të konfirmuara kundër tij, dënimin e mundshëm të gjatë me burgim që mund të rezultojë prej tyre, dhe përmes procesit të vazhdueshëm të zbulimit, ai vazhdimisht po fiton më shumë njohuri për provat që do të paraqiten në lidhje me ato krime. Megjithatë, vazhdimi i gjyqit e çon rrezikun e ikjes në një nivel edhe më të lartë, pasi Veseli tashmë sheh që provat kundër tij të hyjnë vazhdimisht në rekord. Kombinimi i vazhdimit të fitimit të njohurive më të plota për rastin kundër tij, duke parë faktin se provat fajësuese hyjnë në procesverbal, dhe duke u vënë re përmes rastit Mustafa për mundësinë reale të një dënimi të gjatë, e ngre rrezikun e Veselit për t’u ikur në një ‘mundësi mjaft reale’”, thuhet në këtë parashtrim të Prokurorisë.

Që nga koha kur janë arrestuar në nëntor të vitit 2020, katër krerët e UÇK-së kanë qëndruar gjatë gjithë kohës në paraburgim. Ngjashëm sikur edhe të akuzuarit e tjerë.

Aty u janë refuzuar të gjitha kërkesat për mbrojtje në liri apo arrest shtëpiak, madje kërkesa të cilat kanë përfshirë edhe garancione nga shtete të fuqishme.