Trajneri i Liverpoolit, Arne Slot, këmbëngul se mbrojtësi Trent Alexander-Arnold është “plotësisht i përkushtuar ndaj nesh,” mes spekulimeve për të ardhmen e tij.

Mbrojtësi i djathtë i Anglisë mbetet pa kontratë në verë, dhe burime të BBC-së kanë raportuar se Real Madridi ka bërë një qasje – por jo një ofertë – për ta transferuar atë në janar, të cilën Liverpooli e ka refuzuar.

Mediat spanjolle gjithashtu kanë raportuar se Real Madridi është i gatshëm ta blejë 26-vjeçarin këtë muaj, por Slot është i sigurt se lojtari nuk do të shpërqendrohet dhe ka konfirmuar se Alexander-Arnold do të jetë në formacionin startues të Liverpoolit kundër Manchester United këtë fundjavë.

“Mund t’ju them se ai do të luajë të dielën dhe shpresoj që të sjellë të njëjtat paraqitje që ka treguar në gjysmën e parë të vitit. Mendoj se të gjithë e panë se sa mirë ishte në gjysmën e parë të sezonit, sa shumë është këtu, sa shumë dëshiron të fitojë këtu. E shoh në fushën e stërvitjes çdo ditë. Ai është plotësisht i përkushtuar ndaj nesh dhe do të luajë të dielën”, ka thënë Scot.

Ka pasur gjithashtu spekulime për të ardhmen e Mohamed Salah dhe Virgil van Dijk, pasi edhe ata janë në gjashtë muajt e fundit të kontratave të tyre në Anfield.

Slot ka theksuar : “Nëse do të destabilizoheshin lojtarët e Liverpoolit sepse të tjerët flasin për ta, atëherë do të kishim një problem të madh. Nëse luan në një nga klubet më të mëdha në botë, gjithmonë do të flitet për ty, ndonjëherë në lidhje me klube të tjera. Kjo ndodh shumë shpesh me lojtarët tanë. Ka pasur disa biseda për lojtarët tanë edhe në gjashtë muajt e fundit dhe nuk mendoj se kjo i ka destabilizuar aspak”.